[Bahasa Manggarai] Bacaan Injil dan Renungan Harian Katolik Hari Raya Kristus Raja Semesta Alam, Minggu 20 November 2022

KRISTUS, RAJA, AGU PANGGOL

Luk 23:35-43

1.   Sua’d tombo émé tombo ata cau’n landuk lonto’n bongkok, émé ciri “ata” dité’t Manggarai, rendak agu sompo.

a.   Rendak, ngong tekang mai éta mai, wa mai wa’i taung’s ata haé. Aku kali ata’n.

b.   Sompo, ngong téti, landing téti paés-paés, sua limé, di’a-di’a kéta téti’n. Néka kéta biké, ko ra’a’y.

2.   Oné tombo panggol de Mori Yesus ata séngét lité oné mai reweng nggeluk de Mori leso ho’o, dio’n dé tombo ciri raja de Mori agu ciri raja dité’t manusia.

3.   Ciri raja dité’t manusia éta lobo ata do’y, itu tara céwé do rendak’n. Paka aku kali ata’n, paka séngét aku taung, paka lélo aku taung, paka lut aku taung. Ai éta lobo ata do’y, baro somor te biké ného lidé agu te behas ného kena’y. ciri hi ndasim biké laing agu hi nos biké golo. Ai pati’s liha ata, ho’os ata sundur agu aku’n, ho’o ata hena oné nai daku’n, oké sot iwo’d. Manga’n dé biké agu behas, pu’ung ka’éng kilo, ka’éng béo, nggitu kolé ka’éng Gereja.

4.   Raja de Mori Yesus, raja te sompo ité. Raja Kristus dé Raja ata lélo taung, hilir taung, kawé taung, néka manga ata mora’d. Raja Kristus, ata pépék oné panggol cupu mai ité’y. Ita Liha beti, ita Liha susa, ita Liha panggol dité, agu beti agu susa ného ité kolé’y.

5.   Oné Raja Kristus ho’o, idep agu nuk, hitu dé Raja ata tu’ungn. Raja ata pecing te ba mosé, ba di’a, agu ba hambor.  Hitu dé Raja ata sompo ité: téti di’a-di’a ité ho’o oné mai susa ndékok agu nendep, ba oné gérak.

6.   Mosé ného raja Kristus: paka baé kawé tau, paka baé hilir tau. Néka ba biké agu behas, ného sompo de Mori, nggélok agu bolék. Sompo ata mésé’n, néka baé kat te rendak haé ata. Amén.

Katedral Ruteng, Minggu 20 November 2022

Rm. Valerian Karitas, Pr