[Bahasa Manggarai] Bacaan Injil dan Renungan Harian Katolik Minggu, 16 Oktober 2022

MBERES NGAJI

(Rm. Valerian Karitas, Pr)

(Luk 18:1-8)

Endé-Ema asé-ka’é serani, ata hiang agu momang laku oné ranga de Mori dité Yesus Kristus. Apa betuan wetung reweng nggeluk de Mori lantang’t ité oné mai bacang nggeluk takung misa nggeluk leso hoo?

1.    Mori Yesus toing ité: néka hémong ngaji. Mberes koé ngaji, tilir agu gesar kamping Mori oné ka’éng Gereja, oné imbi dité. Oné mai rapang hakim hot toé manga rantang atan, idep agu nuk di’a, toé manga ngaji ata toé cai lé ranga de Mori’d. Cai lé kéta taungs.

2.    Tombo ngaji dité, apa icin? Ici te laring cain tombo ngaji, manga Mori te séngét ité. Toé’t gesar agu weki ru, toé kolé’t tombo oné buru.

3.    Ici te suan tombo ngaji, momang tu’ung kéta de tité hoo le Morin. Tara mangan séngét, le momang, tara mangan tiba, le momang. Ngaji dité, toé séngét kaut le Morin, tiba le momang kolé.

4.    Landing réi de Mori Yesus, “manga kin ko toé imbi oné lino?”, ngong réi nai dité. Ai lako ngaji dité kaéng tana lino do léléng lako neki.

5.    Lako neki’s ngaji imbi Mori, agu imbi pina naéng. Lako neki’s tegi berkak agu tegi hena kupon agu menang judi. Lako neki’s ngaji tegi dia oné Mori agu pandé da’at latang’t haé ata. Oné nai, toé’g manga pati di’an, hot nia imbi Mori, agu hot nia imbi ata da’at’d ka’éng tana lino. Imbi apa’y di ngaji hitu di?

6.    Pu’un tombo ngaji, mai kéta wa mai nai’n, imbi Mori kanang. Ai toé imbi bo dité ho’o. Imbi laing le séngét tité le Mori’n, agu imbi laing le momang tité le Mori’n. Amén.