[Bahasa Manggarai] Bacaan Injil dan Renungan Harian Katolik Minggu 18 September 2022

Bacang te can: Am. 8:4-7

Bacang te suan: 1Tim. 2:1-8

Injil: Luk 16:1-13

Apa wetung reweng nggeluk de Mori lantang’t itȇ onȇ mai Bacang Nggeluk takung misa leso hoo? Apa ata ngancȇ idep’n litȇ onȇ mai tura ata cau bora hot toȇ manga imbi laingn?

1.     Nȇka lepet kȇta gugum cau bora kaȇng tana lino. Tu’ung, weli le sȇng taungs ca o ca, landing kali toȇ sanggȇ’n taung. Hia’t cau bora, baȇ liha, momang data toȇ ngancȇ weli’y, idep hitu hia. “Coo ȇmȇ tuung toȇ imbi kolȇ kaku lȇ tuang daku hoo, manga kin mbaru te tiba aku”, idep koȇ’n.

2.     Toȇ manga sala’n manga ca o ca, toȇ manga ireng’n ȇmȇ “wua’s raci tukȇ, agu lebo’s kala ako”, ai hitu’s ici’d dempul wuku agu tela toni ditȇ, gejur agu gempur ditȇ, berkak de Mori’n taung situ.

3.     Landing paka lako neki’s: bora di’a nai, bora haȇ diding/asȇ-ka’ȇ, bora momang tau. Toȇ landing le manga’n ga, kanang’t toȇ’d taung haȇ ata. Toȇ landing le bȇta mosȇ ga, “ta’i’n taung ata haȇ”. Toȇ kudu’t rendak agu ȇng te pandȇ da’at dȇ manga ca o ca kaȇng tana lino.

4.     Ici’n reweng de Morin: sanggȇ’n ata tiba ditȇ, “bora ditȇ”, apa kat ngasang’n, jabatan, imbi data, lȇtang tȇmba data, berkak ata tiba laing limȇ ditȇ, nȇka kȇta pandȇ mora “rang de nai”, “rang de imbi”. Idep one nai: ho’o kaku tȇing berkak, lako agu wintuk kaku onȇ berkak soo, “Katolik ki’g”, “anak de Mori kig”, onȇ wintuk agu gauk, onȇ pa’u tombo, onȇ mosȇ kamping haȇ ata.

5.     Ai “bora Mbaru Mȇsȇ” lȇ, toȇ ngancȇ paka le “bora mbaru dokong” lino ho’o, landing ngancȇ paka le nai. Amȇn.

Pastoran Katedral Ruteng, 17 September 2022

Rm. Valerian Karitas, Pr